This text comes from The Scottish Minstrel (Second Series), a historical songbook transcribed on Wikisource and reproduced from the pinned revision linked below.
O! weel may the boatie row,
And better may she speed;
And weel may the boatie row,
That wins the bairns' bread.
The boatie rows, the boatie rows,
The boatie rows fu' weel;
And muckle luck attend the boat,
The merlin and the creel.
When Jamie vow'd he wad be mine,
And wan frae me my heart.
O! muckle lighter grew my cree:,
He swore we'd never part:
The boatie rows, the boatie rows,
The boatie rows fu' weel,
And muckle lighter is the load,
When love bears up the creel.
When Sawney, Jock, and Janetie,
Are up and gotten lear;
They'll help to gar the boatie row,
And lighten a' our care.
The boatie rows, the boatie rows,
The boatie rows fu' weel,
And lightsome be the heart that bears
The merlin and the creel.
And when wi' age we're worn down,
And hirplin' round the door,
They'll help to keep us dry and warm,
As we did them before.
Then weel may the boatie row,
That wins the bairns' bread;
And happy be the lot o' a',
That wish the boatie speed.