Gilderoy 2

Gilderoy was a bonnie boy

Had roses tull his shoon;

His stockings were of silken soy,

Wi' gartars hanging downe:

It was I ween a comely sicht,

To see sae trim a boy;

He was my joy and heart's delicht,

My handsome Gilderoy.

Oh, sic twa charming een he had,

A breath as sweet's a rose;

He never wore a Highland plaid,

But costly silken clothes:

He gain'd the love o' ladies gay,

Nane e'er to him was coy:

Ah, wae is me! I mourn the day,

For my dear Gilderoy.

My Gilderoy and I were born

Baith in ae town thegither;

We scant were seven years before

We 'gan to love each other.

Our daddies and our mammies, they

Were fill'd with meikle joy,

To think upon the bridal day

'Twixt me and Gilderoy.

For Gilderoy, that luve of mine,

Gude faith, I freely bought

A wedding sark of Holland fine,

Wi' silken flowers wrought;

And he gied me a wedding ring,

Which I received with joy:

Nae lad nor lassie e'er could sing

Like me and Gilderoy.

Wi' meikle joy we spent our prime

Till we were baith sixteen;

And aft we pass'd the langsome time

Amang the leaves sae green:

Aft on the banks we'd sit us there,

And sweetly kiss and toy;

Wi' garlands gay wad deck my hair,

My handsome Gilderoy.

Oh, that he still had been content

Wi' me to lead his life!

But, ah, his manfu' heart was bent

To stir in feats of strife;

And he in many a venturous deed

His courage bauld wad try,

And now this gars my heart to bleed

For my dear Gilderoy.

And when of me his leave he took,

The tears they wat mine e'e;

I cave him a love-parting look,

My benison gang wi' thee!

God speed thee weel, mine ain dear heart,

For gane is all my joy;

My heart is rent, sith we maun part,

My handsome Gilderoy.

My Gilderoy, baith far and near,

Was fear'd in ilka toun,

And bauldly bare away the gear

Of mony a Lawland loun:

Nane e'er durst meet him hand to

He was sae brave a boy;

At length wi' numbers he was ta'en,

My handsome Gilderoy!

The Queen of Scots possessit nocht

That my luve let me want;

For cow an' ewe he to me brocht,

And e'en when they were scant:

All those did honestly possess,

He never did annoy,

Who never fail'd to pay their cess

To my love Gilderoy.

Wae worth the loun that made the laws

To hang a man for gear!

To reave of life for ox or ass,

For sheep, or horse, or mear!

Had not the laws been made so strict,

I ne'er had lost my joy;

Wi' sorrow ne'er had wat my cheik

For my dear Gilderoy.

Gif Gilderoy had done amiss,

He micht have banish'd been;

Ah, what sair cruelty is this,

To hang sic handsome men!

To hang the flower o' Scottish land,

Sae sweit and fair a boy!

Nae lady had sae white a hand

As thee, my Gilderoy!

Of Gilderoy sae fear'd they were,

They bound him meikle strong;

Tull Edinburgh they led him there,

And on a gallows hung.

They hung him high abune the rest,

He was sae trim a boy;

There died the youth whom I loo'd best,

My handsome Gilderoy.

Thus having yielded up his breath,

I bare his corpse away;

Wi' tears that trickled for his death,

I wash'd his comely clay;

And sicker in a grave sae deep

I laid the dear-loo'd boy;

And now for ever maun I weep,

My winsome Gilderoy.