This text comes from The Book of Scottish Song, edited by Alexander Whitelaw, a historical songbook transcribed on Wikisource and reproduced from the pinned revision linked below.
Wha wadna be in love
Wi' bonnie Maggie Lauder?
A piper met her gaun to Fife,
And speir'd what was't they ca'd her;—
Eight scornfully she answer'd him,
Begone you hallanshaker!
Jog on your gate, you bladderskate,
My name is Maggie Lauder.
Maggie, quo' he, and by my bags,
I'm fidgin' fain to see thee;
Sit down by nie, my bonnie bird,
In troth I winna steer thee:
For I'm a piper to my trade,
My name is Rob the Ranter;
The lasses loup as they were daft,
When I blaw up my chanter.
Piper, quo' Meg, ha'e ye your bags?
Or is your drone in order?
If ye be Eob, I've heard of you,
Live you upo' the border?
The lasses a', baith far and near.
Have heard o' Rob the Ranter:
I'll shake my foot wi' right gude will,
Gif you'll blaw up your chanter.
Then to his bags he flew wi' speed,
About the drone he twisted;
Meg up and wallop'd o'er the green,
For brawly could she frisk it.
Weel done! quo he— play up! quo she;
Weel bobb'd! quo' Rob the Ranter;
'Tis worth my while to play indeed,
When I ha'e sic a dancer.
Weel ha'e you play'd your part, quo' Meg,
Your cheeks are like the crimson;
There's nane in Scotland plays sae weel,
Since we lost Habbie Simpson.
I've lived in Fife, baith maid and wife,
These ten years and a quarter;
Gin' ye should come to Anster fair,
Speir ye for Maggie Lauder.
The cantie spring scarce rear'd her head,
And winter yet did blaud her,
When the Ranter cam' to Anster fair,
An' spier'd for Maggie Lauder;
A snug wee house in the East Green,
Its shelter kindly lent her;
Wi' canty ingle, clean hearth-stane,
Meg welcomed Rob the Ranter!
Then Rob made bonnie Meg his bride,
An' to the kirk they ranted;
He play'd the auld "East Nook o’ Fife,"
An' merry Maggie vaunted,
That Hab himsel' ne'er play'd a spring,
Nor blew sae weel his chanter,
For he made Anster town to ring;
An' wha's like Rob the Ranter?
For a' the talk an' loud reports
That ever gaed against her,
Meg proves a true an' carefu' wife,
As ever was in Anster;
An' since the marriage knot was tied,
Rob swears he couldna want her,
For he lo'es Maggie as his life,
An' Meg lo'es Rob the Ranter.