Hie, bonnie lassie

Hie, bonnie lassie, blink over the burn,

And if your sheep wander I'll gi'e them a turn;

Sae happy as we'll be on yonder green shade,

If ye'll be my dawtie, and sit in my plaid.

A yowe and twa lammies are a' my haill stock,

But I'll sell a lammie out o' my wee flock,

To buy thee a head-piece, sae bonnie and braid,

If ye'll be my dawtie, and sit in my plaid.

I ha'e a wee whittle made me a trout creel,

And, oh, that wee whittle I likit it weel;

But I'll gi'e't to my lassie, and mair if I had,

If she'll be my dawtie, and sit in my plaid.

I ha'e little siller, but ae hauf-year's fee,

But if ye will tak' it, I'll gi'e't a' to thee;

And then we'll be married, and lie in ae bed,

If ye'll be my dawtie, and sit in my plaid.