This text comes from The Book of Scottish Song, edited by Alexander Whitelaw, a historical songbook transcribed on Wikisource and reproduced from the pinned revision linked below.
Ae simmer night, on Logan braes,
I help'd a lassie on wi' her claes,
First wi' her stockings, and syne wi' her shoon, &c.]
"By Logan's streams that rin sae deep,
Fu' aft wi' glee I've herded sheep;
Herded sheep, or gather'd slaes,
Wi' my dear lad, on Logan braes.
But wae's my heart! thae days are gane,
And I, wi' grief, may herd alane;
While my dear lad maun face his faes,
Far, far frae me, an' Logan braes.
"Nae mair at Logan kirk will he
Atween the preachings meet wi' me;
Meet wi' me, or when it's mirk,
Convoy me hame frae Logan kirk.
I weel may sing thae days are gane—
Frae kirk an' fair I come alane,
While my dear lad maun face his faes,
Far, far frae me, an' Logan braes!
"At e'en, when hope amaist is gane,
I dauner out, or sit alane,
Sit alane beneath the tree
Where aft he kept his tryst wi' me.
O! cou'd I see thae days again,
My lover skaithless, an' my ain!
Belov'd by frien's, rever'd by faes,
We'd live in bliss on Logan braes."
While for her love she thus did sigh,
She saw a sodger passing by,
Passing by wi' scarlet claes,
While sair she grat on Logan braes:
Says he, "What gars thee greet sae sair,
What fills thy heart sae fu' o' care?
Thae sporting lambs has blythsome days
An' playfu' skip on Logan braes?"
"What can I do but weep and mourn?
I fear my lad will ne'er return,
Ne'er return to ease my waes,
Will ne'er come hame to Logan braes."
Wi' that he clasp'd her in his arms,
And said, "I'm free from war's alarms,
I now ha'e conquer'd a' my faes,
We'll happy live on Logan braes."
Then straight to Logan kirk they went,
And join'd their hands wi' one consent,
Wi' one consent to end their days,
An' live in bliss on Logain braes.
An' now she sings, "thae days are gane,
When I wi' grief did herd alane,
While my dear lad did fight his faes,
Far, far frae me an' Logan braes."