This text comes from The Book of Scottish Song, edited by Alexander Whitelaw, a historical songbook transcribed on Wikisource and reproduced from the pinned revision linked below.
Down whar the burnie rins whimplin' and cheery,
When love's star was smilin'; I met wi' my dearie;
Ah! vain was its smilin', she wadna believe me,
But said wi' a saucy air, "Laddie, Oh! leave me,
"Leave me, leave me, laddie. Oh! leave me."
"I've lo'ed thee o'er truly to seek a new dearie,
I've lo'ed thee o'er fondly, through life e'er to weary,
I've lo'ed thee o'er lang, love, at last to deceive thee:
Look cauldly or kindly, but bid me not leave thee."
Leave thee, leave thee, &c.
"There's nae ither saft e'e that fills me wi' pleasure,
There's nae ither rose-lip has half o' its treasure,
There's nae ither bower, love, shall ever receive me,
Till death break this fond heart—oh, then I maun leave thee."
Leave thee, leave thee, &c.
The tears o'er her cheeks ran like dew frae red roses;
What hope to the lover one tear-drop discloses;
I kiss'd them, and blest her, at last to relieve me
She yielded her hand, and sigh'd, "Oh! never leave me."
Leave me, leave me, &c.