Ane-and-twenty, Tam

And oh, for ane-and-twenty, Tam!

And hey, for ane-and-twenty, Tam!

I'll learn my kin a rattlin' sang,

Gin I saw ane-and-twenty, Tam.

They snool me sair, and haud me down,

And gar me look like bluntie, Tam;

But three short years will soon wheel roun',

And then comes ane-and-twenty, Tam.

A gleib o' lan', a claut o' gear,

Were left me by my auntie, Tam;

At kith and kin I needna speir,

Gin I saw ane-and-twenty, Tam.

They'll ha'e me wed a wealthy coof,

Though I mysel' ha'e plenty, Tam;

But hear'st thou, laddie?—there's my lufe,—

I'm thine at ane-and-twenty, Tam!