This text comes from The Book of Scottish Song, edited by Alexander Whitelaw, a historical songbook transcribed on Wikisource and reproduced from the pinned revision linked below.
Ye flowery banks o' bonnie Doon,
How can ye bloom sae fair;
How can ye chant, ye little birds,
And I sae fu' o' care?
Thou'll break my heart, thou bonnie bird,
That sings upon the bough,
Thou minds me o' the happy days
When my fause love was true.
Thou'll break my heart, thou bonnie bird,
That sings beside thy mate;
For sae I sat, and sae I sang,
And wist na o' my fate.
Aft ha'e I roved by bonnie Doon,
To see the woodbine twine,
And ilka bird sang o' its love;
And sae did I o' mine.
Wi' lightsome heart I pu'd a rose,
Frae aff its thorny tree;
And my fause luver staw the rose,
But left the thorn wi' me.