This text comes from The Book of Scottish Song, edited by Alexander Whitelaw, a historical songbook transcribed on Wikisource and reproduced from the pinned revision linked below.
Blythe, blythe and merry was she,
Blythe was she but and ben,
Blythe by the banks of Earn,
And blythe in Glenturit glen.
By Ochtertyre there grows the aik
On Yarrow braes the birken shaw,
But Phemie was a bonnier lass
Than braes o' Yarrow ever saw.
Her looks were like a flower in May,
Her smile was like a simmer morn;
She tripped by the banks o' Earn,
As light's a bird upon a thorn.
Her bonnie face it was as meek,
As onie lamb upon a lee;
The evening sun was ne'er sae sweet
As was the blink o' Phemie's e'e.
The Highland hills I've wander'd wide,
And o'er the Lawlands I ha'e been;
But Phemie was the blythest lass,
That ever trod the dewy green.