This text comes from The Poetical Works of Robert Burns, a historical songbook transcribed on Wikisource and reproduced from the pinned revision linked below.
In simmer when the hay was mawn,
And corn wav'd green in ilka field,
While claver blooms white o'er the lea,
And roses blaw in ilka bield;
Blithe Bessie in the milking shiel,
Says, 'I'll be wed, come o't what will;'
Out spak a dame in wrinkled eild,
'O' guid advisement comes nae ill.
'It's ye have wooers monie a ane,
And, lassie, ye're but young ye ken:
Then wait a wee, and cannie wale
A routhie butt, a routhie ben:
There's Johnie o' the Buskie-glen,
Fu' is his barn, fu' is his byre;
Tak this frae me, my bonie hen,
It's plenty beets the luver's fire.'
'For Johnie o' the Buskie-glen
I dinna care a single flie;
He lo'es sae weel his craps and kye,
He has nae luve to spare for me:
But blithe's the blink o' Robie's ee,
And weel I wat he lo'es me dear:
Ae blink o' him I wad nae gie
For Buskie-glen and a' his gear.'
'O thoughtless lassie, life's a faught!
The canniest gate, the strife is sair;
But aye fu' han't is fechtin best,
A hungry care's an unco care:
But some will spend, and some will spare,
An' wilfu' folks maun hae their will;
Syne as ye brew, my maiden fair,
Keep mind that ye maun drink the yill.'
'O, gear will buy me rigs o' land,
And gear will buy me sheep and kye.
But the tender heart o' leesome luve
The gowd and siller canna buy:
We may be poor—Robie and I,
Light is the burden luve lays on;
Content and luve brings peace and joy,
What mair hae queens upon a throne?