This text comes from The Poetical Works of Robert Burns, a historical songbook transcribed on Wikisource and reproduced from the pinned revision linked below.
Gane is the day, and mirk's the night,
But we'll ne'er stray for faute o' light,
For ale and brandy's stars and moon,
And bluid-red wine's the risin sun.
CHORUS.
Then guidwife count the lawin, the lawin, the lawin,
Then guidwife count the lawin, and bring a coggie mair.
There's wealth and ease for gentlemen,
And semple-folk maun fecht and fen',
But here we're a' in ae accord,
For ilka man that's drunk's a lord.
Then guidwife count, &c.
My coggie is a haly pool,
That heals the wounds o' care and dool;
And pleasure is a wanton trout,
An' ye drink it a' ye'll find him out.
Then guidwife count, &c.