This text comes from The Poetical Works of Robert Burns, a historical songbook transcribed on Wikisource and reproduced from the pinned revision linked below.
Chorus.
Ca' the yowes to the knowes,
Ca' them where the heather grows,
Ca' them where the burnie rows,
My bonie dearie.
Hark! the mavis' evening sang
Sounding Clouden's woods amang,
Then a faulding let us gang,
My bonie dearie.
Ca' the, &c.
We'll gae down by Clouden side,
Thro' the hazels spreading wide,
O'er the waves that sweetly glide
To the moon sae clearly.
Ca' the, &c.
Yonder Clouden's silent towers,
Where at moonshine midnight hours,
O'er the dewy-bending flowers,
Fairies dance sae cheery.
Ca' the, &c.
Ghaist nor bogle shalt thou fear;
Thou'rt to love and Heaven sae dear,
Nocht of ill may come thee near,
My bonie dearie.
Ca' the, &c.
Fair and lovely as thou art,
Thou hast stown my very heart;
I can die—but canna part,
My bonie dearie.
Ca' the, &c.
While waters wimple to the sea;
While day blinks in the lift sae hie;
Till clay-cauld death shall blin' my ee,
Ye shall be my dearie.
Ca' the, &c.