This text comes from The Poetical Works of Robert Burns, a historical songbook transcribed on Wikisource and reproduced from the pinned revision linked below.
Her daddie forbad, her minnie forbad;
Forbidden she wadna be:
She wadna trow't, the browst she brew'd
Wad taste sae bitterlie.
The lang lad they ca' Jumpin' John
Beguiled the bonie lassie,
The lang lad they ca' Jumpin' John
Beguiled the bonie lassie.
A cow and a cauf, a yowe and a hauf,
And thretty gude shillin's and three;
A vera gude tocher, a cotter-man's dochter,
The lass with the bonie black e'e.
The lang lad they ca' Jumpin' John
Beguiled the bonie lassie,
The lang lad they ca' Jumpin' John
Beguiled the bonie lassie.