Highland Harry

My Harry was a gallant gay;

Fu' stately strode he on the plain;

But now he's banish'd far away,

I'll never see him back again.

Oh, for him back again!

Oh, for him back again!

I wad gi'e a' Knockhaspie's land

For Highland Harry back again.

When a' the lave gae to their bed,

I wander dowie up the glen;

I sit me down, and greet my fill,

And aye I wish him back again.

O, were some villains hangit hie,

And ilka body had their ain,

Then I micht see the joyfu' sicht,

My Highland Harry back again.

Sad was the day, and sad the hour,

He left me in his native plain,

And rush'd his much-wrong'd Prince to join;

But, oh! he'll ne'er come back again!

Strong was my Harry's arm, in war,

Unmatch'd in a' Culloden's plain;

But vengeance marks him for her ain—

I'll never see him back again.