This text comes from The Poetical Works of Robert Burns, a historical songbook transcribed on Wikisource and reproduced from the pinned revision linked below.
My Harry was a gallant gay,
Fu' stately strade he on the plain!
But now he's banish'd far away,
I'll never see him back again.
Chorus.
O for him back again,
O for him back again,
I wad gie a' Knockhaspie's land,
For Highland Harry back again.
When a' the lave gae to their bed,
I wander dowie up the glen;
I sit me down and greet my fill,
And ay I wish him back again.
O for him, &c.
O were some villains hangit high,
And ilka body had their ain,
Then I might see the joyfu' sight,
My Highland Harry back again!
O for him, &c.