This text comes from The Poetical Works of Robert Burns, a historical songbook transcribed on Wikisource and reproduced from the pinned revision linked below.
O steer her up, and haud her gaun—
Her mother's at the mill, jo;
And gin she winna take a man,
E'en let her take her will, jo;
First shore her wi' a kindly kiss,
And ca' another gill, jo,
And gin she take the thing amiss,
E'en let her flyte her fill, jo.
O steer her up, and be no blate,
And gin she tak it ill, jo,
Then lea'e the lassie till her fate,
And time nae langer spill, jo:
Ne'er break your heart for ae rebute,
But think upon it still, jo;
Then gin the lassie winna do't,
Ye'll fin' anither will, jo.