This text comes from The Poetical Works of Robert Burns, a historical songbook transcribed on Wikisource and reproduced from the pinned revision linked below.
She's fair and fause that causes my smart,
I lo'ed her meikle and lang:
She's broken her vow, she's broken my heart,
And I may e'en gae hang.
A coof cam in wi' rowth o' gear,
And I hae tint my dearest dear,
But woman is but warld's gear,
Sae let the bonie lass gang.
Whae'er ye be that woman love,
To this be never blind,
Nae ferlie 'tis tho' fickle she prove,
A woman has't by kind:
O Woman lovely, Woman fair!
An Angel form's faun to thy share,
'Twad been o'er meikle to've gien thee mair,
I mean an Angel mind.