This text comes from The Poetical Works of Robert Burns, a historical songbook transcribed on Wikisource and reproduced from the pinned revision linked below.
A guid New-Year I wish thee, Maggie!
Hae, there's a ripp to thy auld baggie:
Tho' thou's howe-backit, now, an' knaggie,
I've seen the day,
Thou could hae gane like ony staggie
Out-owre the lay.
Tho' now thou's dowie, stiff, an' crazy,
An' thy auld hide's as white's a daisie,
I've seen thee dappl't, sleek an' glaizie,
A bonie gray:
He should been tight that daur't to raize thee,
Ance in a day.
Thou ance was i' the foremost rank,
A filly buirdly, steeve, an' swank,
An' set weel down a shapely shank,
As e'er tread yird;
An' could hae flown out-owre a stank,
Like onie bird.
It's now some nine-an'-twenty year,
Sin' thou was my guid-father's meere;
He gied me thee, o' tocher clear,
An' fifty mark;
Tho' it was sma', 'twas weel-won gear,
An' thou was stark.
When first I gaed to woo my Jenny,
Ye then was trottin wi' your minnie:
Tho' ye was trickie, slee, an' funnie,
Ye ne'er was donsie;
But hamely, tawie, quiet, an' cannie,
An' unco sonsie.
That day, ye pranc'd wi' muckle pride,
When ye bure hame my bonie bride;
An' sweet an gracefu' she did ride,
Wi' maiden air!
Kyle-Stewart I could bragged wide,
For sic a pair.
Tho' now ye dow but hoyte and hoble,
An' wintle like a saumont-coble,
That day ye was a jinker noble
For heels an' win'!
An' ran them till they a' did wauble,
Far, far behin'.
When thou an' I were young and skeigh,
An' stable-meals at fairs were driegh,
How thou wad prance, an' snore, an' skrieigh
An' tak the road!
Town's-bodies ran, and stood abeigh,
An' ca't thee mad.
When thou was corn't, an' I was mellow,
We took the road ay like a swallow:
At Brooses thou had ne'er a fellow,
For pith an' speed;
But ev'ry tail thou pay't them hollow,
Whare'er thou gaed.
The sma', droop-rumpl't, hunter cattle,
Might aiblins waur't thee for a brattle;
But sax Scotch miles thou try't their mettle,
An' gart them whaizle:
Nae whip nor spur, but just a wattle
O' saugh or hazel.
Thou was a noble fittie-lan',
As e'er in tug or tow was drawn!
Aft thee an' I, in aught hours gaun,
On guid March-weather,
Hae turn'd sax rood beside our han',
For days thegither.
Thou never braing't, an' fetch't, an' fliskit,
But thy auld tail thou wad hae whiskit,
An' spread abreed thy weel-fill'd brisket,
Wi' pith an' pow'r,
Till spritty knowes wad rair't and riskit,
An' slypet owre.
When frosts lay lang, an' snaws were deep,
An' threaten'd labour back to keep,
I gied thy cog a wee-bit heap,
Aboon the timmer;
I ken'd my Maggie wad na sleep
For that, or simmer.
In cart or car thou never reestit;
The steyest brae thou wad hae face't it;
Thou never lap, an' sten't, and breastit,
Then stood to blaw;
But just thy step a wee thing hastit,
Thou snoov't awa.
My pleugh is now thy bairn-time a':
Four gallant brutes as e'er did draw;
Forbye sax mae, I've sell't awa,
That thou hast nurst:
They drew me thretteen pund an’ twa,
The vera warst.
Monie a sair daurk we twa hae wrought,
An' wi' the weary warl' fought!
An' monie an anxious day, I thought
We wad be beat!
Yet here to crazy age we're brought,
Wi' something yet.
And think na, my auld, trusty servan',
That now perhaps thou's less deservin,
An' thy auld days may end in starvin,
For my last fou,
A heapit stimpart, I'll reserve ane
Laid by for you.
We've worn to crazy years thegither;
We'll toyte about wi' ane anither;
Wi' tentie care I'll flit thy tether
To some hain'd rig,
Whare ye may nobly rax your leather,
Wi' sma' fatigue.