This text comes from The Poetical Works of Robert Burns, a historical songbook transcribed on Wikisource and reproduced from the pinned revision linked below.
The bairns gat out wi' an unco shout,
The deuk's dang o'er my daddie, O!
The fient ma care, quo' the feirie auld wife,
He was but a paidlin body, O!
He paidles out, and he paidles in,
An' he paidles late and early, O;
This seven lang years I hae lien by his side,
An' he is but a fusionless carlie, O.
O haud your tongue, my feirie auld wife,
O haud your tongue now, Nansie, O:
I've seen the day, and sae hae ye,
Ye wadna been sae donsie, O;
I've seen the day ye butter'd my brose,
And cuddl'd me late and earlie, O;
But downa do's come o'er me now,
And, oh, I find it sairly, O!