This text comes from The Poetical Works of Robert Burns, a historical songbook transcribed on Wikisource and reproduced from the pinned revision linked below.
The laddies by the banks o' Nith,
Wad trust his Grace wi' a', Jamie,
But he'll sair them as he sair'd the king—
Turn tail and rin awa, Jamie.
Up and waur them a', Jamie,
Up and waur them a';
The Johnstons hae the guidin' o't,
Ye turncoat Whigs, awa.
The day he stude his country's friend,
Or gied her faes a claw, Jamie,
Or frae puir man a blessin' wan,
That day the duke ne'er saw, Jamie.
But wha is he, his country's boast?
Like him there is na twa, Jamie;
There's no a callant tents the kye,
But kens o' Westerha', Jamie.
To end the wark, here's Whistlebirck,
Lang may his whistle blaw. Jamie;
And Maxwell true o' sterling blue,
And we'll be Johnstons a', Jamie.