This text comes from The Poetical Works of Robert Burns, a historical songbook transcribed on Wikisource and reproduced from the pinned revision linked below.
In coming by the brig o' Dye,
At Darlet we a blink did tarry;
As day was dawin in the sky
We drank a health to bonie Mary.
Theniel Menzie's bonie Mary;
Theniel Menzie's bonie Mary;
Charlie Gregor tint his plaidie,
Kissin' Theniel's bonie Mary.
Her een sae bright, her brow sae white,
Her haffet locks as brown's a berry,
An' ay they dimpled wi' a smile
The rosy cheeks o' bonie Mary,
Theniel Menzie's bonie Mary,
Theniel Menzie's bonie Mary;
Charlie Gregor tint his plaidie
Kissin' Theniel's bonie Mary.
We lap an' danced the lee-lang day,
Till piper lads were wae an' weary,
But Charlie gat the spring to pay
For kissin' Theniel's bonie Mary.
Theniel Menzie's bonie Mary,
Theniel Menzie's bonie Mary;
Charlie Gregor tint his plaidie
Kissin' Theniel's bonie Mary.