This text comes from The Poetical Works of Robert Burns, a historical songbook transcribed on Wikisource and reproduced from the pinned revision linked below.
There's a youth in this city, it were a great pity,
That he from our lasses should wander awa;
For he's bonie and braw, weel favour'd witha',
And his hair has a natural buckle and a'.
His coat is the hue of his bonnet sae blue ;
His fecket is white as the new-driven snaw;
His hose they are blae, and his shoon like the slae,
And his clear siller buckles they dazzle us a'.
His coat is the hue, &c.
For beauty and fortune the laddie's been courtin;
Weel-featur'd, weel-tocher'd, weel-mounted and braw;
But chiefly the siller, that gars him gang till her,
The pennie's the jewel that beautifies a'.
There's Meg wi' the mailin, that fain wad a haen him,
And Susy whase daddy was Laird o' the ha';
There's lang-tocher'd Nancy maist fetters his fancy,
—But the laddie's dear sel he lo'es dearest of a'.