This text comes from The Poetical Works of Robert Burns, a historical songbook transcribed on Wikisource and reproduced from the pinned revision linked below.
Willie Wastle dwalt on Tweed,
The spot they ca'd it Linkumdoddie,
Willie was a wabster guid,
Cou'd stown a clue wi' onie bodie;
He had a wife was dour and din,
O Tinkler Madgie was her mither;
Sic a wife as Willie had,
I wad na gie a button for her.
She has an ee, she has but ane,
The cat has twa the very colour:
Five rusty teeth, forbye a stump,
A clapper tongue wad deave a miller;
A whiskin beard about her mou,
Her nose and chin they threaten ither;
Sic a wife, &c.
She's bow-hough'd, she's hein shinn'd,
Ae limpin leg a hand-breed shorter;
She's twisted right, she's twisted left,
To balance fair in ilka quarter:
She has a hump upon her breast,
The twin o' that upon her shouther;
Sic a wife, &c.
Auld baudrans by the ingle sits,
An' wi' her loof her face a-washin;
But Willie's wife is nae sae trig,
She dights her grunzie wi' a hushion;
Her walie nieves like midden-creels,
Her face wad fyle the Logan-water;
Sic a wife as Willie had,
I wad na gie a button for her.