This text comes from The Poetical Works of Robert Burns, a historical songbook transcribed on Wikisource and reproduced from the pinned revision linked below.
Tho' women's minds like winter winds
May shift and turn, and a' that,
The noblest breast adores them maist,
A consequence I draw that.
For a' that, and a' that,
And twice as meikle's a' that,
The bonie lass that I loe best
She'll be my ain for a' that.
Great love I bear to all the fair,
Their humble slave, and a' that;
But lordly will, I hold it still
A mortal sin to thraw that.
For a' that, &c.
But there is ane aboon the lave,
Has wit, and sense, and a' that;
A bonie lass, I like her best,
And wha a crime dare ca' that?
For a' that, &c.
In rapture sweet this hour we meet,
Wi' mutual love and a' that;
But for how lang the flie may stang,
Let inclination law that.
For a' that, &c.
Their tricks and craft hae put me daft,
They've ta'en me in, and a' that;
But clear your decks, and here's 'The Sex!'
I like the jades for a' that.
For a' that, &c.