This text comes from The Book of Scottish Song, edited by Alexander Whitelaw, a historical songbook transcribed on Wikisource and reproduced from the pinned revision linked below.
Ba loo! my bonnie lammie,
An' I'll sing you a bit sang;
An' I'll tak' tent, my hinny,
That naething sall you wrang.
Your wee bit bed is saft an' warm,
For it was made by me
An' ye are lyin' safe frae harm
Aneath a mither's e'e.
Ba loo! my sweet wee dawtie,
This is your time o' spring,
When a' is sweet, an' fresh, an' pure—
Nae guilt the heart to sting.
O, lang in innocence remain,
An' safe at hame abide;
An' still uphaud by virtuous deeds
A mither's honest pride!
Ba loo! ye laughin' rogie!
Ye ha'e your daddie's e'e,
Sae sparklin' an' sae winsome—
His glance, sae sweet and slee.
Like him aye may ye grow, till meet
To mingle amang men;
But his sair toils an' sorrows
I pray you ne'er may ken!
Sleep soun', my winsome laddie!
Your daddie 's on the sea—
He 's toilin' late an' early
For bread to you an' me.
Hale nights I lie an' listen
Wi' feelings lane and drear;
An' whan I hear the risin' storm
I'm like to swarf wi' fear.
But while the win's are whistlin'
Wi' wild an' eerie tune,
For my dear Jamie's safety
I look to Ane aboon;
For He can calm the stormy win',
An' still the ragin' sea,
An' bring again my dear gudeman
To my sweet bairn and me.