Blue-e'ed Mary

My only love I canna rue,

My bonnie blue-e'ed Mary, O,

I ne'er will break the bosom vow

I've plighted to my dearie, O.

A fairer form I canna see,

A fairer face there canna be,

Nane bears a love sae leal as thee,

My bonnie blue-e'ed Mary, O.

I'll wait thee in the greenwood glen,

Amang the braes sae briery, O,

For there the Noran leaps the linn,

An' tells me of my dearie, O.

Thy hair's, the glossy falling stream,

Thy brow, the pure, the milky feam,

Thy cheeks, the dimpling eddies seem—

My bonnie blue-e'ed Mary, O.

I ne'er had love for ane but thee

Amang the maids sae cheery, O;

You ne'er lov'd ane but only me,

My ain, my dearest dearie, O.

My morn o' love—the morn o' thine,

An' a' our happy days sinsyne,

The chords o' mem'ry canna tyne,

My bonnie blue-e'ed Mary, O.

While morning lifts his gowden eye,

An' glints o'er a' sae cheerie, O;

While e'ening veils the face o' day,

An' starnies gild the cary, O;

My only love—my bosom vow—

My plighted faith I'll never rue,

But live in love an' bliss wi' you,

My bonnie blue-e'ed Mary, O.