This text comes from The Book of Scottish Song, edited by Alexander Whitelaw, a historical songbook transcribed on Wikisource and reproduced from the pinned revision linked below.
O, where did ye get that hauver-meal bannock?—
O, silly blind body, O, dinna ye see?
I gat it frae a brisk young sodger laddie,
Between Saint Johnston and bonnie Dundee.
O whare gat ye that bonnie blue bonnet?
O what makes them aye put the question to me?
I gat it frae a bonnie Scots callan,
Atween St. Johnstoun and bonnie Dundee.
O gin I saw the laddie that ga'e me't!
Aft has he doudl'd me upon his knee;
May heaven protect my bonnie Scots laddie
And send him safe hame to his baby and me.
My heart has nae room when I think on my laddie,
His dear rosy haffets bring tears to my e'e—
But, O! he's awa', and I dinna ken whar he's—
Gin we could ance meet we'll ne'er part till we die,
O light be the breezes around him saft blawin';
And o'er him sweet simmer still blink bonnilie,
And the rich dews o' plenty, around him wide fa'in,
Prevent a' his fears for my baby and me!
My blessings upon that sweet wee lippie!
My blessings upon that bonnie ee-brie
Thy smiles are sae like my blythe sodger laddie,
Thou's aye the dearer and dearer to me.
But I'll big a bower on yen green bank sae bonnie,
That's lav'd by the waters o' Tay wimplin' clear,
And deed thee in tartans, my wee smiling Johnnie,
And make thee a man like thy daddie dear.