This text comes from The Book of Scottish Song, edited by Alexander Whitelaw, a historical songbook transcribed on Wikisource and reproduced from the pinned revision linked below.
Ca' the yowes to the knowes,
Ca' them whare the heather grows,
Ca' them whare the burnie rows,
My bonnie dearie.
As I gaed down the water side,
There I met my shepherd lad,
He row'd me sweetly in his plaid,
And ca'd me his dearie.
Ca' the ewes, &c.
Will ye gang down the water side,
And see the waves sae sweetly glide
Beneath the hazels spreading wide,
The moon it shines fu' clearly.
Ca' the yowes, &c.
I was bred up at nae sic school,
My shepherd lad, to play the fool;
And a' the day to sit in dool,
And nae body to see me.
Ca' the yowes, &c.
Ye shall get gowns and ribbons meet,
Cauf leather shoon upon your feet,
And in my arms ye'se lie and sleep,
And ye shall be my dearie.
Ca' the yowes, &c.
If ye'll but stand to what ye've said,
I'se gang wi' you, my shepherd lad;
And ye may row me in your plaid,
And I shall be your dearie.
Ca' the yowes, &c.
While waters wimple to the sea,
While day blinks in the lift sae hie;
Till clay-cauld death shall blin' my e'e,
Ye aye shall be my dearie.
Ca' the yowes, &c.