This text comes from The Book of Scottish Song, edited by Alexander Whitelaw, a historical songbook transcribed on Wikisource and reproduced from the pinned revision linked below.
Baloo, baloo, my wee wee thing,
O saftly close thy blinkin' e'e!
Baloo, baloo, my wee wee thing,
For thou art doubly dear to me.
Thy daddie now is far awa',
A sailor laddie o'er the sea;
But Hope aye hechts his safe return
To you, my bonnie lamb, an' me.
Baloo, baloo, my wee wee thing,
O saftly close thy blinkin' e'e!
Baloo, baloo, my wee wee thing,
For thou art doubly dear to me.
Thy face is simple, sweet, an' mild.
Like ony simmer e'ening fa';
Thy sparkling e'e is bonnie black;
Thy neck is like the mountain snaw.
Baloo, baloo, my wee wee thing,
O saftly close thy blinkin' e'e!
Baloo, baloo, my wee wee thing,
For thou art doubly dear to me.
O but thy daddie's absence lang.
Might break my dowie heart in twa,
Wert thou na left a dawtit pledge,
To steal the eerie hours awa'.