This text comes from The Book of Scottish Song, edited by Alexander Whitelaw, a historical songbook transcribed on Wikisource and reproduced from the pinned revision linked below.
Tibby has a store o' charms,
Her genty shape our fancy warms;
How strangely can her sma' white arms
Fetter the lad who looks but at her;
Fra'er ancle to her slender waste,
These sweets conceal'd invite to dawt her;
Her rosy cheek, and rising breast,
Gar ane's mouth gush bowt fu' o' water.
Nelly's gawsy, saft and gay,
Fresh as the lucken flowers in May;
Ilk ane that sees her, cries, Ah hey,
She's bonny! O I wonder at her.
The dimples of her chin and cheek,
And limbs sae plump invite to dawt her;
Her lips sae sweet, and skin sae sleek,
Gar mony mouths beside mine water.
Now strike my finger in a bore,
My wyson with the maiden shore,
Gin I can tell whilk I am for,
When these twa stars appear thegither.
O love! why does thou gi'e thy fires
Sae large, while we're oblig'd to neither?
Our spacious sauls immense desires,
And aye be in a hankerin' swither.
Tibby's shape and airs are fine,
And Nelly's beauties are divine:
But since they canna baith be mine,
Ye gods, give ear to my petition:
Provide a good lad for the tane,
But let it be with this provision,
I get the other to my lane,
In prospect plano and fruition.