I'll lo'e thee, Annie

I'll lo'e thee, Annie, while the dew

In siller bells hings on the tree;

Or while the burnie's waves o' blue

Rin wimplin' to the rowin' sea.

I'll lo'e thee while the gowan mild

Its crimson fringe spreads on the lea;

While blooms the heather in the wild—

Oh! Annie, I'll be true to thee.

I'll lo'e thee while the lintie sings

His sang o' love on whinny brae;

I'll lo'e thee while the crystal springs

Glint in the gowden gleams o' day;

I'll lo'e thee while there's licht aboon,

And stars to stud the breast o' sky;

I'll lo'e thee till life's day is done,

And bless thee wi' my latest sigh.