Lizy Liberty

There lives a lassie on the brae,

O! but she's a bonnie creature;

They ca' her Lizy Liberty,

And monie ane's wooing at her.

Wooing at her, fain wad ha'e her,

Courting at, but canna get her;

Bonnie Lizy Liberty,

There's o'er monie wooing at her.

Her mither wears a plettit mutch;

Her father is an honest dyker,

An' she hersel's a daintie quean,

Ye winna shaw me monie like her.

Wooing at her, &c.

A pleasant lass she's kent to be,

Wi' fouth o' sense an' smeddum in her;

There's no a swankie far or near,

But tries wi' a' his might to win her.

Wooing at her, &c.

But sweet and pleasant as she is,

She winna thole the marriage tether,

But likes to rove and rant about,

Like highland couts amang the heather.

Wooing at her, &c.

It's seven years, and somewhat mair,

Sin' Matthew Dutch made courtship till her,

A merchant bluff, ayont the burn,

Wi' heaps o' breeks an' bags o' siller.

Wooing at her, &c.

The next to him was Baltic John,

Stept up the brae and keeket at her,

Syne turn'd as great a fool's he came,

And in a day or twa forgat her.

Wooing at her, &c.

Now Lawrie French has ta'en the whim

To toss his airs, and frisk about her,

And Malcolm Fleming puffs and swears

He disna value life without her.

Wooing at her, &c.

They've casten out wi' a' their kin,

Thinking that wad gar them get her;

Yet after a' the fash they've ta'en,

They maybe winna be the better.

Wooing at her, &c.

But Donald Scot's the happy lad,

Wha seems to be the coshest wi' her,

He never fails to get a kiss,

As aften as he likes to see her.

Wooing at her, &c.

But Donald, tak' a friend's advice,

Although I ken ye fain wad ha'e her,

E'en just be doing as ye are,

And haud wi' what ye're getting frae her.

Wooing at her, &c.

Ye're weel, and wats nae, as we say,

In getting leave to dwell beside her;

And gin ye had her mair your ain,

Ye'd maybe find it waur to guide her.

Wooing at her, &c.

Ah! Lawrie, ye've debauch'd the lass,

Wi' vile new-fangled tricks ye've play'd her;

Depraved her morals;—like an ass,

Ye've courted her, and syne betray'd her.

Wi' hanging of her, burning of her

Cutting, hacking, slashing at her;

Bonnie Lizy Liberty,

May ban the day ye ettled at her.