This text comes from The Book of Scottish Song, edited by Alexander Whitelaw, a historical songbook transcribed on Wikisource and reproduced from the pinned revision linked below.
Now in her green mantle blythe nature arrays,
And listens the lambkins that bleat ower the braes,
While birds warble welcome in ilka green shaw;
But to me it's delightless—my Nannie's awa'.
The snaw-drap and primrose our woodlands adorn,
And violets bathe in the weet o' the morn;
They pain my sad bosom, sae sweetly they blaw!
They mind me o' Nannie—and Nannie's awa'.
Thou laverock, that springs frae the dews of the lawn,
The shepherd to warn of the grey-breaking dawn,
And thou mellow mavis, that hails the night-fa';
Give over for pity—my Nannie's awa'.
Come, autumn, sae pensive, in yellow and grey.
And soothe me wi' tidings o' nature's decay:
The dark, dreary winter, and wild-driving snaw,
Alane can delight me—my Nannie's awa'.