This text comes from The Scottish Minstrel (First Series), a historical songbook transcribed on Wikisource and reproduced from the pinned revision linked below.
Oh, gin I were a baron's heir,
And could I braid wi' gems yer hair,
And mak ye braw as ye are fair,
Lassie, would ye luve me?
And could I tak ye to the town,
And shaw ye braw sights mony a ane,
And busk ye fine in silken gown,
Lassie, would ye luve me?
Or should ye be content to pruve,
In lowly life unfading luve,
A heart that nought on earth could muve,
Lassie, would ye luve me?
And ere the lav'rock wing the skie,
Say, wad ye to the forest hie,
And work wi' me sae merrilie,
Lassie, could ye luve me?
And when the braw moon glistens o'er
Our wee bit bield and heathery muir,
Will ye na greet for ye're sae puir,
Lassie, tho' I luve ye?
For I hae nought to offer ye,
Nae gowd frae mine, nae pearl frae sea,
Nor am I come o' hie degree,
Lassie, but I luve ye.