This text comes from The Book of Scottish Song, edited by Alexander Whitelaw, a historical songbook transcribed on Wikisource and reproduced from the pinned revision linked below.
Oh whar was ye sae late yestreen,
My bonnie Jeannie Gray?
Your mither miss'd you late at e'en,
And eke at break o' day.
Your mither look'd sae sour and sad,
Your father dull and wae,
Oh! whar was ye sae late yestreen,
My bonnie Jeannie Gray?
I've mark'd that lanely look o' thine,
My bonnie Jeannie Gray;
I've kent your kindly bosom pine,
This monie, monie day.
Ha'e hinnied words o' promise lur'd
Your guileless heart astray?
O! dinna hide your grief frae me,
My bonnie Jeannie Gray.
Dear sister, sit ye down by me,
And let nae body ken;
For I ha'e promis'd late yestreen
To wed young Jamie Glen;
The melting tear stood in his e'e,
What heart could say him nay?
As aft he vow'd, through life, I'm thine,
My bonnie Jeannie Gray.